雖然係用詞誇張咗，
用「特別走資技巧」嚟形容「錢存外國，香港使用」，
本來呢樣嘢並唔算係啲咩好特別嘅技巧，
任何一個外國銀行戶口嘅銀行卡都可以用嚟喺香港消費，
就等如一個普通香港銀行戶口嘅銀行卡都可以用嚟係外國消費。
不過想特別提呢及呢樣嘢嘅原因係，
呢件原本冇咩咁特別但其實重要嘅事情，
喺呢幾年嘅移民走佬走資討論卻唔見有好多人談及。
「錢存外國，香港使用」嘅優點，
當然係錢存放咗喺外國，
唔怕香港啲銀行爆煲、被制裁、聯繫匯率爆機時連累埋你嘅血汗錢一齊仆街。
如是者，到底有幾多人喺佢哋嘅走資組合裡面欠缺「錢存外國，香港使用」呢個環節，
甚至乎唔知道呢個世界原來係有呢回事呢？
Wise(前稱Transferwise)係公認其中一個市面上最好用嘅匯款走資工具。
要做到「錢存外國，香港使用」，
Transferwise會係一個理想方案：
1) Transferwise可以低成本地做到「錢存外國，香港使用」呢個效果。
相比起使用其它外國實體銀行或網上銀行嘅銀行卡在港消費，
應該都好難搵到一間匯款手續費可以平得過Transferwise。
2) 當你肉身仍然喺香港仍未出發去外國嘅時候，
都有辦法可以開得到Transferwise戶口，並取得虛擬卡。
雖然Transferwise唔接受以香港地址開戶，
但本blog有介紹解決方法。請參看：
基本上，只要你開咗個Transferwise戶口，
開通張虛擬卡並設置好Apple Pay Google Pay，
就可以用嚟喺香港使用消費。
但必需注意，用Transferwise卡喺香港使用消費亦有一大缺點。
對於一個喺香港搵錢香港洗嘅人，
如果你係由香港嘅銀行過數入去Transferwise戶口top up，
係不能直接將港幣存入Transferwise戶口裡面，
而係要將啲港幣轉換成其它貨幣如英鎊歐元等外幣才可存入，
然後到你用張Transferwise卡喺香港消費時，
又要將啲外幣再轉換番做港幣。
如是者過程就經歷咗2次兌換，
而每一次兌換都要支付少少匯率差價。
點解不能直接將港幣存入Transferwise戶口裡面呢？
Transferwise支援嘅貨幣有50隻，
但當中只有10隻係有"account details"，
意思係指只有呢10隻貨幣喺你嘅Transferwise戶口裡面擁有屬於佢自己嘅戶口號碼。
情況就有如你喺Citibank HK開一個multi currency account，
一個戶口裡面有多隻貨幣嘅戶口，
呢咁多隻貨幣嘅戶口嘅戶口號碼都唔同，
但就其實全部都屬於同一個戶口，
全部都係專屬你一個人使用嘅。
舉個例。英鎊同歐元係屬於呢10隻有"account details"嘅其中2隻。
當你想存入英鎊去你嘅Transferwise英鎊戶口，
你嘅Transferwise英鎊戶口有屬於佢自己嘅戶口號碼，
咁你就跟番呢個戶口號碼存入英鎊就可以top up個英鎊戶口。
如果你想人哋過數入錢落你呢個英鎊戶口，
亦都同樣跟番呢個戶口號碼過數俾你。
而當你想存入歐元去你嘅Transferwise歐元戶口，
就有另一個屬於你Transferwise歐元戶口嘅戶口號碼。
即使英鎊戶口同歐元戶口嘅號碼唔同，
但兩個戶口同樣都係屬於你一個人的。
而其餘40隻貨幣，包括港幣，係冇"account details"，
喺你嘅Transferwise戶口裡面就冇屬於佢自己嘅戶口號碼。
當你由你香港嘅銀行戶口將港幣存入去Transferwise，
Transferwise會俾一個Citibank HK嘅戶口號碼叫你入錢落去，
但呢個號碼並唔係你一個人專用嘅，
而係冚世界嘅Transferwise客人都係用呢同一個戶口號碼入港幣俾Transferwise，
而你要喺過數時喺Reference一欄填上你嘅Transferwise會員編號用嚟識別嗰筆錢係你屬於你嘅。
Transferwise規定嗰40隻貨幣只能用呢種方法入錢俾Transferwise，
又規定用呢個方法入錢俾Transferwise之後必需轉換成嗰10隻貨幣才可儲存喺你嘅Transferwise戶口。
而日後當你想使用港幣(或者其餘嗰39隻貨幣)消費時，
Transferwise會喺你嗰10隻貨幣戶口裡面本身已經有嘅存款自動轉換成港幣(或者其餘嗰39隻貨幣)支付消費。
點解Transferwise會咁樣做法呢，
呢個問題要問番Transferwise了，
我估大概係因為要提供一隻貨幣嘅"account details"會牽涉到好多成本、會計同法規嘅問題。
總之事實就係如此，我都冇辦法。
以上所講嘅缺點，
對於由香港嘅銀行將港幣存入Transferwise戶口嘅人嚟講，
每喺香港用Transferwise消費一次，
就會前後產生總共2次兌換嘅匯率支出，
存入時港幣變英鎊，消費支出時英鎊變番港幣。
不過如果你想存入嘅貨幣係屬於嗰10隻貨幣，
例如你嘅資金本身已經擺咗喺英國嘅銀行，本來已經係英鎊，
咁當你想top up Transferwise英鎊戶口時，
就係由你英國嘅銀行戶口本地過數英鎊去你嘅Transferwise英鎊戶口，
咁整個程序所經歷嘅兌換次數就會少一次。
呢個「錢存外國，香港使用」嘅避險大法，
值唔值得付出2次兌換嘅匯率支出就見仁見智。
我自己嘅個人睇法就認為，
喺肉身仍然未能撤離香港之前，
係有必要先將大部份棺材本走資轉移去外國，
只留低應付香港日常所需嘅生活費暫存喺Citibank HK作日常消費使用。
(強調必需要係美資嘅Citibank HK，而唔係其它中資港資或者投共英資嘅香港銀行。)
「錢存外國，香港使用」呢個消費渠道，
就作為當香港日常生活費短缺時作為應急方案。
可以參看另一篇介紹Transferwise嘅文章：
仍然身處香港，未到步外國，都一樣可以取得Transferwise戶口 & debit card
Transferwise教學：
https://chinesecommunistdoomsday.blogspot.com/2023/02/transferwise.html
最後，請支持一吓，
用我嘅referral link開戶：
同埋仲有另一間誠意推介嘅網上匯款公司Currency Fair：
可以用特衰護照、香港地址、香港電話號碼開戶嘅外國網上匯款公司：Currency Fair
Referral link：
Currency Fair嗰條referral link如果你用嚟開戶口同埋達到指定匯款金額，
你都會得到HKD$450迎新獎金。
Comments
Post a Comment