我諗以下呢個方法喺中文世界應該冇乜其他人會喺公開場合分享，
因為我自己都承認呢個方法可能會有些少取巧成份，
但到頭來係咪真係取巧就好視乎你點樣用法。
我曾經喺連登開post稍為講過呢個方法，
有5毛多次留言攻擊咬定我係教唆人虛報地址。
對此我並不感到意外，
因為共匪最怕睇到大量人移民走資，出盡賤招企圖阻撓。
我嘅目的係希望能夠令到更多人更有效率走資，
走得越多錢越有效打擊共匪春袋。
5毛越係攻擊我，
越係證明我講嘅嘢擊中共匪春袋。
至於我提出嘅呢個方法算唔算係教唆人虛報地址，
大家睇完之後可以自行判斷。
喺正式介紹此法之前需要先強調一件事情。
我並不太建議運用此法去任何一間以你目的地國家為基地嘅銀行去開立戶口，
即係譬如你嘅目的地係英國，
我唔太建議你用呢個方法去以英國為基地嘅銀行開戶口，
例如係HSBC UK、Barclays、Nat West、Revolut、Monzo等等。
吓！？又要去英國，又要唔好用呢個方法去開英國嘅銀行戶口？
即係我喺度嗡緊廢話？
原因同解決方法要留到尾段解釋，
所以呢篇長文煩請由頭睇到落尾。
方法是咁的，選擇有2個：
一) 外國B&B地址
二) 外國秘書公司地址
先講B&B地址：
如果你啱啱到達移民目的地國家，
仲未有地方長住，只係租咗間B&B短住；
或者你可能仍然未抵步目的地，仍然身處香港，
只係網上book咗間B&B準備出發；
甚至你可能連移民手續都未搞，
或者仍然等緊移民資格審批，
外國居留權仍未到手。
而你想開一個目的地國家嘅銀行戶口，
於是你問B&B房東，
可唔可以借個B&B地址俾你開銀行戶口&收銀行信，
房東答你可以。
然後你成功用個B&B地址喺當地開咗個銀行戶口，
喺嗰個B&B地址收到銀行寄俾你嘅信。
試諗一諗，
你會喺嗰個B&B地址長住嗎？
答案當然係唔會，
你會稍後搵過另外一個真正長住嘅地址落腳。
咁你向銀行報稱短住嘅B&B地址，
開完戶口之後搬走，
算唔算係虛報地址呢？
答案當然係唔算。
你可以進一步諗諗，
每次當你開一個銀行戶口，
其實你係咪真係有需要收銀行寄俾你嘅嘢呢？
以後你開多幾次銀行戶口就會知，
答案係視乎你開嘅戶口屬於咩類型嘅金融機構。
如果你開嘅戶口係實體銀行，例如HSBC咁，
銀行除咗寄銀行卡密碼信俾你之外，
仲會每月寄月結單俾你，
或者係啲通知信件之類。
如果你開嘅戶口唔係屬於實體銀行，
而係啲網上銀行，
咁就除咗張銀行卡之外，
一般嚟講以後都冇咩嘢會寄俾你。
又或者如果你開嘅係一啲網上匯款公司戶口、網上證券戶口等等，
大致上其實直頭唔會有嘢需要寄俾你。
你再進一步諗諗，既然係咁，
你係咪一定要搵一個真係能夠收到信嘅外國地址去登記開戶呢？
答案係視乎你想開咩戶口，
如果好似以上所講，
開一啲網上銀行戶口、網上匯款公司戶口、網上證券戶口嘅話，
就唔一定需要。
唔好忘記，
呢個世界係有虛擬銀行卡，
可以用Apple Pay Google Pay俾錢消費，
甚至自動轉賬。
所以，其實就算你冇一個可以收到信嘅外國地址，
只要你有辦法開立得到外國銀行/匯款公司戶口，
並且取得虛擬卡，
咁嘅話你就唔一定需要銀行寄張實體卡俾你。
記住，你嘅真正目的，
係喺你仍然身處香港就已經可以開立外國銀行/匯款公司戶口，
預先將你嘅身家性命財產走資轉移去外國，
同埋喺你仍未踏足外國之前就已經可以取得並開始使用虛擬卡。
只要能夠達到目的，
就不必執著你嘅外國地址係咪真係能夠收得到信。
好了。講到呢度，聰明嘅你，
除咗問外國嘅親戚朋友借地址之外，
仲可以用咩途徑取得外國地址呢？
貼士係：如果你去旅行要book B&B住，你會去咩地方搵呢？
再俾多個貼士：既然你唔需要真係用個地址嚟收信，
咁你仲需唔需要真係親身去到現場踏足嗰間B&B呢？
你係咪淨係知道嗰間B&B嘅地址已經足夠？
我自己當初啱啱抵步時都係同樣情況，
未有長期住址，只係租咗間B&B短住。
嗰間B&B成棟大廈都係啲酒店式公寓，
個信箱係成楝大廈咁多個單位共用同一個大信箱，
我直頭問都冇問個B&B房東就用咗個地址去開銀行戶口收銀行信，
收到銀行寄銀行卡密碼信嚟之後就搬走咗，
全個過程B&B房東根本唔知，
但我喺搬走咗之後係有通知番銀行我嘅新地址。
咁以上呢個方法到底係咪虛報地址呢？
再俾多個貼士你：
如果你唔記得通知銀行/遲咗通知銀行你改咗地址，
跟住會有咩事發生呢？
呢啲咁嘅事，應該已經有無數咁多人都試過。
我自己都試過，我都係搬走咗之後隔咗幾個禮拜先至通知番銀行，
期間忙得濟唔記得咗所以咪遲咗搞囉。
你未試過嘅話，
可以搵人問吓，或者自己試吓囉~~~
嗱！唔好話我教唆你呀。
我俾貼士唔一定要親身踏足間B&B，
又俾貼士唔記得通知銀行/遲咗通知銀行會點，
意思其實係指，
當你仍然身處香港仍未出發，
只係代表你「仲未」親身踏足間B&B啫，
但係日後你到咗步之後咪「將會」親身踏足囉！
好了，依家解釋番點解不太建議用此法去任何一間以你目的地國家為基地嘅銀行去開立戶口。
呢個方法嘅精髓在於喺你未到達目的地國家之前已經成功開得到外國戶口。
不過當中可能會有一個少少嘅隱憂。
以我喺英國生活嘅經驗，
有好多情況，例如係申請/補領英國車牌、
向銀行/金融機構申請分期付款、樓按、借貸、等等...
都會問你提供過往3年嘅住址紀錄。
如果你用呢個方法喺你開戶口填申請表時，
填上一個你仲未喺嗰度住嘅地址，
咁萬一，日後竟然有人認真要起你底，
認真調查你過往住過咩地方，
而又竟然可以成功查得出你咩時間住過咩地方，
發現你真正喺嗰度居住嘅時間同你所填嘅時間唔脗合，
我就唔知如果萬一竟然真係發生啲咁嘅情況會有咩後果。
(其實我就唔多信會有人咁得閒走去咁樣起你底，
我估除非你牽涉犯罪活動被警方調查吧。)
出過嚟社會打滾嘅成年人，
難道會唔知呢啲咁嘅個人資料，
任何人都可以求其老作一餐咩。
一直以嚟，借親戚朋友地址、
用秘書公司地址、
去旅行用B&B地址嚟開銀行戶口呢啲方法一直都存在，
並唔係我今時今日先至發明。
但係你有冇聽過，
有人會單純因為用親戚朋友、秘書公司、B&B地址去開銀行戶口，
而被控使用虛假資料相關嘅罪行？
攻擊我教唆人虛報地址嘅5毛，
亦都可以話冇實名制嘅太空卡係俾機會人犯法，
所以香港依家咪有太空卡實名制囉。
人哋西方國家有相對上健康嘅民主政體，
一般奉公守法嘅良好市民大家講個信字。
而若果係本身有不良意圖嘅人刻意虛報地址，
亦都唔需要我教都早就已經會識得呢啲方法。
但係我哋今時今日嘅香港，
如果唔係因為已經淪淊至此，
廣大市民又何需為自己嘅畢生血汗錢四處奔走而部署走資。
對於未有經濟能力/未到合適時機踏足海外去開外國銀行戶口嘅人，
坊間又有幾多走資情報能夠照顧得到呢類人士嘅需要呢。
所以我想公開呢個方法，
原意並唔係啲咩要教唆他人虛報資料破壞互信，
而係因為今日淪落至如斯田地嘅香港已經到咗非走不可嘅境地，
權衡輕重之下還是覺得應該公開此法讓看官自行決定是否採納。
我都只能夠講，閣下有緣睇到呢個方法嘅介紹，
是否採用最終都必需自行評估風險，自行承擔後果。
5毛要攻擊嘅話總會搵到諸多籍口，簡直浪費時間。
好喇，既然去A國家但又唔太建議用呢個方法去開A國家嘅銀行戶口，
咁應該開咩戶口先至啱呢？
好practical嘅建議係：
用呢個方法去開一啲好似Wise(前稱Transferwise)一類比較唔係咁強地域性嘅匯款公司戶口。
我唔係銀行界從業員，對銀行業冇乜認識，
只係以一個普通人嘅常理去推斷。
雖然Transferwise係英國註冊，受英國嘅法規監管，
但係可以諗吓，
點解英國本地嘅銀行，去開戶口時多數都要求出示地址證明，
但Transferwise就唔洗；
點解英國本地嘅銀行，去開戶口時都要求用番英國本地嘅地址，
但Transferwise就接受好多其它國家嘅地址呢。
無論原因係咩都好，
總之既然Transferwise唔要求你出示地址證明，
寄完張實體卡俾你之後就再冇其它嘢寄俾你(其實你連張實體卡都唔一定需要)，
總之冇手尾跟就係了。
可以參看本blog介紹Transferwise嘅文章：
仍然身處香港，未到步外國，都一樣可以取得Transferwise戶口 & debit card
如果你還是覺得B&B地址呢個方法算係取巧出古惑，
令你覺得周身唔聚財唔想採用，
咁你可以選擇用秘書公司地址呢個方法。
不過要提醒，即使選用秘書公司地址嚟開戶口，
但係如果你用秘書公司地址去開目的地國家嘅銀行戶口，
其實都仍然係會有報稱地址同實際住址不符嘅問題。
所以到頭來始終都係較為建議揀好似Transferwise呢類匯款公司開戶，
原因都係因為Transferwise唔要求你開戶時出示地址證明。
你或者會質疑，既然同B&B地址一樣都係報稱地址同實際住址不符，
咁咪一樣都係取巧出古惑啫？
你又可以諗吓，
其實你係咪一定要喺嗰個國家居住，
先至可以開嗰個國家嘅銀行戶口呢？
呢個世界夠大把人唔喺嗰個國家居住，
都一樣可以喺嗰個國家開離岸公司開銀行戶口。
所以用秘書公司地址開戶口，
你可以理解為喺秘書公司所在嗰個國家開一間離岸公司兼開個戶口咁解。
依家係想介紹既簡易又低成本嘅方法，
所以先至推介唔需要地址證明嘅Transferwise而唔係其它銀行。
在此推介呢間秘書公司：
呢間係以我所知最平可以租到外國地址嘅秘書公司，
一年只需GBP£19。
開完戶口之後就唔再需要個地址，
第二年可以取消個subscription。
就算你嘅目的地國家唔係英國都一樣可以照用，
直至你有你自己嘅外國地址後先至再更改番都得。
Trustpilot有4點幾分，可信冇伏。
如果你仍然都係覺得連用秘書公司地址都有出古惑成份，
咁我建議你一個少少退而求其次嘅方法，
就係用另一間叫Currency Fair嘅網上匯款公司。
呢間係開宗明義可接受香港地址、香港電話號碼、特衰護照開戶，
但Currency Fair比Transferwise冇咁多好用嘅功能。
我嘅個人建議係Transferwise同Currency Fair兩間都去開個戶口，
兩者各有優劣互補不足。
詳情可參看呢篇Currency Fair介紹文章：
可以用特衰護照、香港地址、香港電話號碼開戶嘅外國網上匯款公司：Currency Fair
最後，我咁好心機打咁多字，
請支持一吓，
用我嘅referral link開戶：
Transferwise：
Currency Fair：
Currency Fair嗰條referral link如果你用嚟開戶口同埋達到指定匯款金額，
你都會得到HKD$450迎新獎金。
Comments
Post a Comment